Important churches in kerala

ചേര്‍പ്പുങ്കല്‍ പളളി

ചേര്‍പ്പുങ്കല്‍ ദേവാലയ ചരിത്രം നമ്മുടെ പിതാവായ മാര്‍ത്തോമ്മാ ശ്ലീഹാ, മഹാദേവര്‍ പട്ടണം അഥവാ മുസലി പട്ടണം എന്നീ പേരുകളില്‍ അറിയപ്പെട്ടിരുന്ന കൊടുങ്ങല്ലൂരില്‍ നിന്ന് മലമ്പ്രദേശ പട്ടണമായ നിലയ്ക്കലേയ്ക്ക് കാല്‍നടയായി പോയി എന്നും പ്രസ്തുത യാത്ര ചേര്‍പ്പുങ്കല്‍ പാലാ വഴി ആയിരുന്നു എന്നും ഐതിഹ്യമുണ്ട്. ആറിന്റെ വടക്കേ കരയില്‍ പാണ്ടിദേശക്കാരായ വ്യാപാരികളുടെ വക മൂന്ന് പീടികകള്‍ ഉണ്ടായിരുന്നുവെന്നും തന്മൂലം ആ സ്ഥലത്ത് മൂന്ന്പീടിക എന്ന നാമം ഉണ്ടായെന്നും പറയപ്പെടുന്നു. ആ സ്ഥലത്ത് എത്തിച്ചേര്‍ന്ന തോമ്മാശ്ലീഹായുടെ അത്ഭുത പ്രവര്‍ത്തികളും അദ്ദേഹം ഉപദേശിച്ച ക്രിസ്തുചരിത്രവും കുറെപ്പേരെ മാനസാന്തരപ്പെടുത്തി. അവര്‍ ക്രിസ്തുസഭയില്‍ ചേര്‍ന്നു. തോമ്മാശ്ലീഹാ അവിടെ ഒരു കുരിശ് സ്ഥാപിച്ചു. അവര്‍ക്ക് സ്ഥിരം സമ്മേളിക്കാനും വിശ്വാസത്തോടെ പ്രാര്‍ത്ഥിക്കാനുമായി ഒരു കൂടാരം പണിതു. ശ്ലീഹാ തന്റെ ചെരിപ്പ് അവിടെ വച്ചിട്ടാണ് പോയത്. ചെരുപ്പു വച്ച സ്ഥലം പിന്നീട് ചേര്‍പ്പുങ്കല്‍ ആയി. അവിടെ വടക്കേക്കരയില്‍ പണിത കൂടാരം ആദ്യത്തെ പള്ളിയുമായെന്നാണ് ചരിത്ര വിശ്വാസം.

1096-ല്‍ ചില പ്രത്യേക കാരണങ്ങളാല്‍ ആറിന്റെ വടക്കേ കരയില്‍ നിന്ന് പള്ളി തെക്കേക്കരയിലേയ്ക്ക് മാറ്റി സ്ഥാപിച്ചു. അന്നത്തെ നാടുവാഴിയായ പൂഞ്ഞാറ്റില്‍ തമ്പുരാന്റെ പ്രത്യേക കല്പന പ്രകാരമാണ് ഇങ്ങനെ ഒരു നടപടി സ്വീകരിച്ചത്. പള്ളി വയ്ക്കുന്നതിനുള്ള സ്ഥലം ഇന്നാട്ടിലെ പ്രധാന ജന്മിയായ കല്ലംപള്ളി നമ്പൂതിരി ദാനമായി നല്‍കിയതാണ്. ചേര്‍പ്പുങ്കല്‍ പള്ളിയും കല്ലംപള്ളി ഇല്ലവുമായുള്ള സാഹോദര്യം ഊഷ്മളമായി തുടരുന്നു. എല്ലാ വര്‍ഷവും സെപ്തംബര്‍ 14ന് ആഘോഷിക്കുന്ന കല്ലിട്ടതിരുനാളില പ്രധാന അള്‍ത്താരയില്‍ കല്ലംപള്ളി ഇല്ലക്കാര്‍ക്കുവേണ്ടി നടതുറന്ന് കുര്‍ബ്ബാന അര്‍പ്പിക്കുന്ന പതിവിന് മുടക്കം വന്നിട്ടില്ല. വട്ടമറ്റത്തില്‍ വലിയ പീലിപ്പോസച്ചനാണ് ഇപ്പോള്‍ കാണുന്ന ചെറിയ പള്ളിയും പള്ളിമേടയും പണികഴിപ്പിച്ചത്. വലിയപള്ളി പുതുക്കി പണി തിര്‍ത്തത് 1912 ലാണ് ബ. പള്ളത്തുകുഴി തോമാച്ചനാണ് പള്ളി പണിക്ക് നേതൃത്വം വഹിച്ചത്. 1984 ഫെബ്രുവരി 11-ാം തീയതി ചേര്‍പ്പുങ്കല്‍ പള്ളിയെ ഫൊറോനാ പദവിയിലേക്ക് ഉയര്‍ത്തി. ചേര്‍പ്പുങ്കല്‍ പള്ളിയുടെ പ്രധാന അള്‍ത്താരയില്‍ സ്ഥാപിച്ചിട്ടുള്ള പേര്‍ഷ്യന്‍ നിര്‍മ്മിത ക്രൂശിത ചിത്രമാണ് പ്രധാന വണക്കത്തിനും ബഹുമാനത്തിനും പാത്രീഭൂതമായിരിക്കുന്നത്.

പത്തു നൂറ്റാണ്ടിലേറെ പഴക്കമുള്ള ദിവ്യ ആലേഖ്യമാണിത്. ഈ പള്ളിയിലെ ഒരു നേര്‍ച്ചയായ നട തുറന്നു കുര്‍ബ്ബാനയുടെ ചരിത്രം ഈ ക്രൂശിത ചിത്രവുമായി ബന്ധപ്പെട്ടതാണ്. ആദ്യകാലങ്ങളില്‍ ക്രൂശിതചരിത്രം സ്ഥാപിച്ചിരുന്ന രൂപക്കൂടിന്റെ വാതില്‍ തുറന്നിട്ടാണ് നട തുന്നു കുര്‍ബ്ബാന അര്‍പ്പിച്ചിരുന്നത്. ഉണ്ണീശോയുടെ മനോഹരമായ ഒരു തിരുസ്വരൂപം പള്ളിയില്‍ സ്ഥാപിച്ചതോടുകൂടി ഭക്തജനങ്ങളുടെ സംഖ്യ കൂടുതലായി. വെള്ളിയാഴ്ചകളില്‍ ഉണ്ണിമിശിഹായോടുള്ള ഭക്തിക്കായി ക്രൈസ്തവരും, അക്രൈസ്തവരുമായ ആയിരക്കണക്കിന് തീര്‍ത്ഥാടകര്‍ പള്ളിയിലെത്തി കെടാവിളക്കില്‍ എണ്ണ ഒഴിക്കുന്ന പതിവ് വളരെ മുമ്പേ ആരംഭിച്ചതാണ്. ഉദ്ദിഷ്ടകാര്യസാധ്യത്തിന് ഈ നേര്‍ച്ച വളരെ ഫലപ്രദമാണ്.